Brilo kaj mizero de la Esperanta vikipedio

[mevamevo]

Hodiaŭ en Simferopolo finfine ekpluvetis (kvankam oni ja devas esti tre granda optimisto, por nomi tiun elĉielan urinon "pluvo"), tial mia planita biciklado al la urbocentro estis prokrastita. Por fari almenaŭ ion utilan mi verkis artikolon pri "Misĥoro" por la Esperanta vikipedio. Ve, prefere mi ne estus farinta tion!

La Esperanta vikipedio daŭre degeneras; la simptomoj de tiu degenerado videblas preskaŭ ĉie. Jen en la "artikolo de la semajno" pri Montara Karabaĥo mi legas: "Ĝi kontrolas la plej grandan parton de la teritorio de la antaŭa Aŭtonoma Oblasto Montara Karabaĥo kaj..." Fikfek! Kiu idioto elpensis la vorton "oblasto" kaj kiuj estas tiuj "samideanoj", kiuj ĝin uzas? Metu ĝin en sian pugon!

Jen mi trarigardas la liston de la novaj artikoloj. La bildo estas tiel ilustra, ke mi eĉ prezentos ĝin:

La administranto (!) Thomas Guibal dum 37 minutoj sukcesis krei eĉ 9 "artikolojn"! Do - unu artikolo dum iom pli ol 4 minutoj! Atentindas la grandeco (de 475 ĝis maksimume 1751 bitokoj) kaj aspekto de tiuj "artikoloj" - kelkaj frazoj kun (foje!) unu bildo. Enestas eĉ ne unu ekstera ligo, neniuj fontoj, eĉ ne la ŝablono pri la ĝermeco de tiuj abortaĵoj (vidu kelkajn ekzemplojn: 1, 2, 3, 4). Ĉu tio estas digna vikipedia laboro? Jes ja, per tiaj metodoj ni baldaŭ superos la tutan malverdan mondon, sed ĉu tiu mondo estos impresita? Iuj robote kreitaj artikoloj en la volapuka misvikipedio aspektas pli impone... :(

Ve, ege bedaŭrindas, ke la avangarda kaj tute senpaga projekto transformiĝis en iun kloakon, kies ĉiamuloj en la plej bona okazo penas plumpe "progresigi" kaj "plividebligi" Esperanton, kaj en la plej kutima okazo simple elsputas kaj ejakuligas siajn nekontentigitajn ambiciojn kaj misperceptojn...

Comments

[februaro.livejournal.com]

\\\Ĝi kontrolas la plej grandan parton de la teritorio de la antaŭa Aŭtonoma Oblasto Montara Karabaĥo\\\
Ĉu oni rajtas uzi la vorton 'kontroli' tiusence? Se ne, kiun vorton oni uzu?

[mevamevo.livejournal.com]

"Kontrolas" en tiu kunteksto estas tute normala vorto (kvankam, se oni volas, oni ja povus trovi eĉ pli ĝustan/taŭgan sinonimon, ekz., "regas, administras" ktp.). Tamen, la vorto "oblasto" ĉi tie estas tute freneza.

[yury-finkel.livejournal.com]

Hm, mi tre dubas pri normaleco de "kontroli" en tiu ĉi kunteksto.

Pri "oblasto" mi tute konsentas, kaj iam mi skribis pri tio kaj pri similaj vortoj en la forumo ĉe e-novosti.info.

[mevamevo.livejournal.com]

Ho, ve, pardonu, mi vere elbuŝigis strangaĵon (kaj tutcerte cedis al la influo de la rusa). Jes ja, "kontroli" ne taŭgas ĉi tie.

La plej aktivaj vikipediistoj, verŝajne, simple ne vizitas la forumon - ili estas okupitaj pri la kreado de la novaj artikoloj.

[mevamevo.livejournal.com]

Pardonu, en la antaŭa komento mi diris stultaĵon: ja "kontroli" certe ne taŭgas en tiu ĉi kunteksto. Plej taŭgas, verŝajne, "regi".

[rana-peregrina.livejournal.com]

Где вы научились так ругаться на эсперанто? :)

[mevamevo.livejournal.com]

Долгие годы суровых тренировок :).